LAOAG CITY – Rinugianen nga inpatulod ti Commission on Elections dagiti Automated Counting Machines nga usaren inton eleksion a dumanon iti 110 a ribu nga Automated Counting Machines pakairamanan dagiti official ballot a mausar iti 2025 Midterm Elections inton Mayo 12.
Inbatad ti Commission on Elections a nasken a sakbay ti Mayo 5 ket naipatuloden dagiti Automated Counting Machines ken dagiti official ballots kadagiti maseknan a lugar para iti maisayangkat a final testing ken sealing inton Mayo 6.
Naammoan nga adda ti 47 a ribu nga Automated Counting Machines ti naipadalan iti pre-election logic and accuracy tests wenno maaw-awagan ti pre-LAT ken manamnama a malpas daytoy inton Abril 20.
Inbatad ti Commission on Elections a nakaimprentada ti pakabuklan a 68,542,564 nga official ballots, 18 a milyon a balota ti naipadalanen iti beripikasion ken dagitoy ket direkta nga ipaima iti City Treasurer ti maysa a siudad wenno ili.
Mainaig iti daytoy, ti listaan dagiti botante wenno ti election day computerized voter’s list ket karamanen a naipatulod.
Kabayatanna, dagiti kagamitan inton eleksion kas kadagiti ballot box, dagiti bateria ken dadduma pay a kasapulan inton eleksion ket nai-deploy dagitoyen iti regional hub.
