LAOAG CITY – Naiwayatan ti Search Operation ti agkabsat iti Barangay 19 Sto. Tomas iti ili ti Sarrat.
Nabigbig dagiti subject nga isuda Ciriaco Castillo Jr., agtawen ti 45 ken Gilbert Castillo, agtawen ti 42 nga agpada dagitoy a residente iti nasao met laeng a barangay.
Basar iti Sarrat Municipal Police Station, kabayatan ti panagsukimat dagiti otoridad iti pagtaengan ni Ciriaco ket nagnegatibo idinto a ti panagsukimat dagiti otoridad iti pagtaengan ni Gilbert ket nagpositibo no sadinno a nakitada ti dua a paltog ken balbala iti annex ti pagtaenganna.
Segun ken ni Gilbert, saanna a kukua dagiti naala a paltog ken balbala ken mamati daytoy a naimula laeng dagitoy kontra kenkuana.
Inbatadna a datin a naibalud isuna iti sumurok sangapulo a tawen gapu iti kaso nga homicide.
Inlawlawagna nga awan met ti malagipna nga adda ti nakaririna a nangitunda ti pannakaiwayat ti operasion kontra kenkuana.
Mainaig iti daytoy, basar iti nailanad iti search warrant ket adda ti nakalemmeng nga M16 rifle ken balbala iti uneg ti pagtaengan ti agkabsat.
Kabayatanna, inpakaammo ni Barangay Chairman Wilfred Sebastian ti Barangay 19 Sto. Tomas iti ili ti Sarrat nga awan met dagiti reklamo wenno pakairamramanan ti agkabsat iti barangayda.
