LAOAG CITY – Nasakit ti nakem ti dua a residente iti Barangay 30-B Sta. Maria ditoy siudad ti Laoag kalpasan a maipagarup a naikkat ti naganda iti listaan para kadagiti benepisiario ti Assistance to Individuals in Crisis Situation wenno AICS.
Segun ken ni Ms. Liberty Domingo, nakigtot daytoy idi naammoanna nga awan ti naganna iti listaan kabayatan a nakapila daytoy tapno umawat ti tallo a ribu a pisos kas financial assistance manipud iti nasao a programa.
Gapu iti daytoy, kunana a napabainan unay isuna iti sangoanan ti naruay a tattao ken nasdaaw no apay saan a karaman ti naganna iti listaan.
Inlawlawagna a sinaludsodna ni Barangay Chairwoman Jovelyn Ramos maipanggep iti daytoy a banag ngem awan ti nalawag a rason no apay a naikkat ti naganna.
Inbatadna a naibaga kenkuana nga agturong isuna iti opisina wenno pagtaengan ni Mr. Ryan Remigio gapu ta maipagarup nga isuna ti nangpaikkat ti naganna ngem saan a mamati daytoy gapu ta saan nga am-ammo ni Mr. Remigio isuna.
Kunana a mamati daytoy nga adda ti maris pulitikana iti napasamak kenkuana.
Mainaig iti daytoy, inbatad met ni Mr. Norlan Bayang a maysa pay kadagiti naikkat ti naganna iti listaan a napaay isuna idi naammoanna a saan a makaawat ti financial assistance.
Kabayatanna, inlawlawag ni Kapitana Ramos nga awan ti ammona no apay a naikkat ti nagan ti dua a kabarangayanna iti listaan dagiti makaawat ti financial assistance manipud iti Assistance to Individuals in Crisis Situation.
