LAOAG CITY – Umaboten iti 98 a tattao ti natay idinto a nasurok a 150 a sabsabali dagiti nasugatan kalpasan a narpuug ti bubungan ti nightclub iti Santo Domingo a kabisera ti Dominican Republic.
Karaman kadagiti pimmusay ket ti gobernador ti Monte Cristi a ni Nelsy Cruz ken ni dati a Major League Baseball pitcher Octavio Dotel.
Naamoan a ni Dotel, agtawen ti 51, ket pimmusay kabayatan ti pannakaitaray na iti ospital.
Napasamak ti insidente kabayatan ti konsierto ni popular merengue singer Rubby Pérez iti Jet Set nightclub no sadinno a karaman pay daytoy a natay ken ti manager na.
Ginasut a tattao ti adda iti uneg ti venue idi napasamak ti insidente ken agarop 400 a rescuers ti agtultuloy nga agbirbiruk kadagiti survivors.
Mangnamnama ti director ti Emergency Operations Centre (COE) a ni Juan Manuel Méndez nga ado pay dagiti mabirukan a sibibiag.
Indanun a dagus ni President Luis Abinader ti pannakipagladingit na iti pamilya dagiti pimmusay kagiddan ti panangideklarar na ti tallo nga aldaw a panagladladingit iti intero a pagilian kalpasan ti nakaam-ames a trahedya.
