LAOAG CITY – Nagtalinaed a green category ditoy siudad ti Laoag kabayatan iti panagtultuloy ti campaign period.
Segun ken ni Atty. Julius Balbas, Election Officer ditoy siudad nga iti baet nga adda dagiti maipadpadamag a mapaspasamak nga harassment iti kallabes ket saanda nga iyendorsar a maipangato ti kategoriana.
Inbatadna nga agingga nga awan ti pisikalan ket saanda nga ideklarar iti sabali a kategoria gapu ta adda dagiti panangibasbasaranda a pagannurotan no kasapulan a maipangato wenno maipababa ti kategoria iti maysa a lugar.
Mangnamnama ti Election Officer ditoy siudad ti Laoag nga agtultuloy ti linak, urnos ken talna ditoy siudad agingga a madanon ti aldaw mismo ti panagpipili.
Immuna iti daytoy, kwinestionaran ni Mayor Michael Marcos Keon no apay nga adda iti arig panang-harass-da iti panagkampaniana kadagiti nagduduma a barangay ditoy siudad ti Laoag.
