LAOAG CITY – Impakaammo ni Assistant Sec. Michael Christoper Agustin, ti Commissioner Representing Luzon ti National Youth Commission nga adda maiyuswat nga Special Election para kadagiti barangay nga adda panagkurang ti SK officials-na.
Segun kenkuana, a daytoy ti nagbalin a takder ti National Youth Commission iti naiyuswat a committee hearing dagitoy.
Segun kenkuana, iti babaen ti special election, ket maipaayan ti solusion dagiti agdama a problema ken malitopan dagiti nabakantean a posision iti Sangguniang Kabataan.
Inbatadna a katulungan ti Department of the Interior and Local Government (DILG) ken Commision on Elections (COMELEC) iti pannakaipatungpal ti nasao nga addang tapno masigurado ti kinaplastar ken kinaurnos daytoy.
Innayona a saan a mabalin a mangdutok lattan tapno makompleto dagiti miembro ti SK officials iti maysa a barangay gapu ta adda ti linteg a kasapulan a masurot.
