LAOAG CITY – Umabot iti sumurok P32M ti napagtitipon a naglakoan ti Ilocos Norte iti kallabes a Phil. Travel Mart a naisayangkat idiay SMX Convention Center, Manila.
Segun ken ni Mr. Xavier Ruiz, Senior Tourism Operations Officer ti Ilocos Norte Tourism Office wenno INTO, karaman ditoy ti napagtitipon nga actual sales, potential sales ken dadduma pay kas kadagiti produkto a taraon ken dadduma pay a produkto dagiti kakailian ditoy Ilocos Norte.
Imbatadna nga immabot iti lima gasut pitopulo ket lima ribu a pisos ti actual sales a naglakoan ti produkto nga empanada ken dagiti dadduma pay a produkto dagiti Micro Small and Medium Enterprises wenno MSME’s ti Ilocos Norte.
Impalgakna a ti “actual” ken “potential sales” ket manipud iti “tour packages”, “accommodation bookings”, “Airline Ticket Sales, cruise shore excursion” ken “corporate bookings”.
Inlawlawagna nga iti likudan dagiti nasao a numero, naidumduma ti nariknada a ragsak iti kinaadu dagiti bimmisita iti booth ti probinsia saan laeng a tapno mariknada dagiti napipintas a lugar a mabalin a pasiaren dagiti turista ken dagiti “travel packages” ngem tapno maramananda ti ipampannakel ti probinsia nga empanada ken maaddaan ti naidumduma a padas babaen iti panangipadasda a nagaramid ken nagluto ti empanada.
Innayonna a daytoy ti pammasingked a ti turismo ket saan laeng nga iti panaglako kadagiti “tourism destinations” ngem no maminsan ket mangrugi iti simple a pannakisarsarita agingga iti pannangan kadagiti ipagpampannakkel a taraon iti maysa a lugar a kas iti Ilocos empanada iti Ilocos Norte.
