Inlawlawag ni Mayor James Bryan Alcid dagiti plano para iti pannakapasayaat ti sibubukel a merkado publiko ditoy ciudad ti Laoag.

Kuna na a kalikagom na a no matarimaan ti tiendaan ket agpaot daytoy iti 30 agingga iti 50 a tawen.
Inbatad na a malaksid iti 50 a milyon a pisos nga inpaay ti gobierno national ket nakadawat da pay ti sabali a pondo a mausar para iti pannakaikabil ti solar panel iti tiendaan.

Segun iti mayor, babaen iti maikabil a solar panel iti merkado publiko ket basbassit to ti mabayadan ti kuryente.

Manamnama a marugyan ti pannakatarimaan ti tiendaan ditoy ciudad ti Laoag iti bolan ti Disyembre wenno iti nasapa a paset ti tawen 2027.

Kabayatanna, kuna ti mayor a saan da pay a masinunuo no iti kada kadsaaran ti matarimaan tapno adda latta ti pagyanan dagiti aglaklako iti tiendaan, wenno maminpinsanen a matarimaan.