LAOAG CITY – Inrakurak ti Department of Social Welfare and Development a maibilangen kas solo parent dagiti asawa ti Overseas Filipino Worker nga agtrabtrabaho iti ballasiw taaw ti sumurok maysa a tawen ken karaman iti low/semi-skilled worker category.
Mabenepisiaran dagitoy kadagiti pribilehio iti babaen ti Expanded Solo Parents Welfare Act wenno ti Republic Act No. 11861.
Naammoan a karaman kadagiti benepisio ti PHP1,000 a binulan a subsidiya, otomatiko a sakupen iti National Health Insurance, dagiti exemption iti Value Added Tax ken maipangpangruna iti pabahay ken edukasion.
Kabayatanna, tapno maala dagiti nasao a benepisio, kasapulan nga agparehistro dagiti solo parent iti bukudda a lokal a gobierno tapno makaala ti solo parent ID a masapul nga i-renew iti kada tawen.
