LAOAG CITY – Pinabainan ti San Miguel Beermen ti Barangay Ginebra 104-93 iti agtultuloy a PBA Philippine cup a naisayangkat iti Araneta Coliseum.
Iti rugi pay laeng ti ay-ayam ket insigida nga immarangkada ti Beermen 22-6 ken dimmanon pay iti 21 points daytoy sakbay ti halftime.
Addaanen ti tallo a panangabak ken maysa a pannakaabak ti Beermen idinto ti Ginebra ket addaan ti maysa a panangabak ken maysa a pannakaabak.
Bimmida iti panagballigi ti Beermen ni CJ Perez a nakairekord ti 23 points, innem a rebounds ken lima nga assists idinto nga addaan ti 18 points ken 12 rebounds ni June Mar Fajardo ken 19 points met ti nairekord ni Don Trollano.
Saan met nga immanay ti 24 points ni Troy Rosario idinto nga addaan ti sag-16 points da Stephen Holt ken Jamie Malonzo.
