LAOAG CITY – Inrakurak ti Department of Migrant Workers (DMW) ti plano para iti major expansion ita a tawen ti OFW Hospital (OFWH) kas sungbat iti ngumatngato a kasapulan para iti serbisio.
Karaman iti daytoy a plano ti panangala ti lisensia iti Level 2 manipud iti Department of Health (DOH) a mangipaay iti ospital a manglukat kadagiti Intensive Care Unit, palawaen dagiti serbisio ti outpatient ken mangidiaya ti ad-adu pay nga specialty clinics.
Naripar ti Department of Migrant Workers ti maysa a nakapatpateg a panagngato iti bilang dagiti overseas Filipino worker (OFWs) ken dagiti pamiliada nga agab-avail dagiti serbisio medikal iti ospital a masarakan iti siudad ti San Fernando, Pampanga.
Mainaig iti daytoy, inpakaammo ti Department of Migrant Workers a ti datos ket basar iti First Quarter 2025 Performance Report.
Kabayatanna, target pay ti OFW Hospital ti panangbigbig kas Pre-Employment Medical Examination provider para kadagiti overseas workers ken maysa a lisensiado a Cancer Treatment Facility.
Ti ospital ket agar-aramid ti addang para iti full digitalization dagiti system daytoy.
Ti panangipasdek ti maysa a nailatang a pasdek ti Cancer Center ket manamnama a mangrugi kagiddan ti panangpalawa iti Heart Station, Respiratory ken Radiology units.
