LAOAG CITY – Tinawagan ni US President Donald Trump ni Canadian Prime Minister Mark Carney tapno kablaawan iti panangabak na iti kalepleppas a general election iti Canada.
Naamoan nga iti panagsarita dagiti dua ket nagtulag da nga agkita iti kabiitan a panawen.
Manamnama nga adda ti maiyuswat a dayalogo iti nagbaetan ti Amerika ken Canada tapno pagsaritaan ti maipapan iti baro nga ekonomiya ken security relationship ti dua a pagilian.
Maipalagip nga adda ti panangbabalaw ni Carney iti panangipataw ni Trump ti nangato a taripa kadagiti produkto ti pagilian.
Immun iti daytoy, iti victory speech ni Carney inbatad na nga ikarkarigatan ni US President Trump a waraen ti Canada tapno matagikua daytoy ti America.
Nupay kasta inkari ti prime minister a saanto pulos a mapasamak ti plano ni US President Trump.
