LAOAG CITY – Nakaala ti Pilipinas ti 10 a milyon a dolyar manipud iti Adaptation Fund para iti climate resilience project idiay Tawi-Tawi.
Gagem daytoy tapno masolbar ti kumarkaro a karit iti suplay ti nadalus a danum nangruna kadagiti lugar a vulnerable iti epekto iti panagbalbaliw ti klima.
Inbatad ni Palace Press Officer Claire Castro, adda ti sumurok 71 a ribu a residente iti probinsia ti Tawi-Tawi ti manamnama a mabenepisiaran iti development funding a naawat ti Pilipinas manipud iti multilateral agency nga adaptation fund.
Mausar ti grant tapno tulongan dagiti ili ti Sibutu ken Sitangkai a masolbar ti kumarkaro nga epekto ti climate change.
Basar iti Mindanao Development Authority (MDA), karaman kadagiti pakausaran ti pundo ti programa para iti pannakapasayaat ti access iti natalged a danum dagiti residente ken kas suporta iti lokal nga industria ti seaweed.
Daytoy ti umuna a daras a nakaawat ti pagilian ti development funding manipud iti nasao nga ahensia.
