LAOAG CITY – Maysa nga agtawen ti 15 a Nigerian nga addaan ti autism ti nakagun-od ti world record kalpasan a binigbig ti Guinness World Records kas nangpartuat ti “largest art canvas” iti intero a lubong.
Ni Kanyeyachukwu Tagbo-Okeke wenno Kanye ket pormal a pinadayawan ti Guinness certificate idi Abril 2, kagiddan ti World Autism Acceptance Day.
Ti obrana a nadakdakkel pay iti dua a football field ket naisangsangayan a work of art a nagbalin a paset ti panangitandudo ti “Impossibility is a Myth,” a gagem nga ipadanon mainaig iti autism ken makaukkon ti pundo para iti The Zeebah Foundation.
Ti panagaramid kadagiti artwork ti nagserbi a wagas ni Kanye tapno maipeksa ti bagina. Iti baet ti kondisionna, binigbig isuna ti nagduduma a paset ti lubong.
Pinadayawan isuna idiay Austria idi agtawen daytoy ti walo, naaddaan ti solo exhibit idiay Nigeria ken napili a naitampok ti pinartuatna iti maysa nga international art catalogue.
Dinayaw ni Nigerian President Bola Tinubu ni Kanye ken inawaganna daytoy a “brave, audacious and tenacious.”
Para met iti ama ni Kanye, napateg ti adbokasiada tapno ikkaten ti stigma kadagiti ubbing nga addaan ti special needs.
Kunana nga awan ti ubing a nasken nga ibain gapu ta isuda ket maibilang a fabulous, autistic ken talented.
