LAOAG CITY – Inikkaten ti Philippine government ti ban iti panagangkat ti domestic ken wild birds pakairamanan ti poultry products manipud idiay State of Minnesota, USA.
Inbatad ti Department of Agriculture, basar iti Memorandum Order No. 22, inpalubos ni Agriculture Secretary Francisco Tiu Laurel Jr. ti panagserrek iti pagilian ti live poultry, poultry meat, day-old chicks, eggs, ken semen manipud idiay Minnesota.
Inlawlawag ti Department of Agriculture nga inisyal nga inpatungpal ti ban tapno protektaran ti local poultry industry, napateg para iti food security ti pagilian ken napateg a pangal-alaan ti trabaho ken panagpuunan.
Segun pay iti Agriculture Department, ti decision nga ikkaten ti import ban ket basar iti official reports manipud iti United States veterinary authorities iti World Organisation for Animal Health no sadinno a kinumpirmaranna nga amin a naipadamag a kaso ti HPAI kadagiti naapektaran a lugar idiay Minnesota ket nasolbaren.
Naammoan nga awan ti outbreaks a naipadamag kalpasan ti Pebrero 28.
