LAOAG CITY – Nasakit ti nakem ni Barangay Chairman Gil Repato iti Barangay 12 iti ili ti San Nicolas gapu iti pannakaireklamo na kadwa na ti dua pay a kagawad na nga isuda Allan Acosta ken Julius Coloma mainaig iti maipagarop a panangbulbully da iti agtutubo a ni Wilson Ramil Jr. a rason ti dandani na panagpakamatay.
Ti nasao a reklamo ket indanun a mismo ti ina ti agtutubo iti Bombo Radyo Laoag.
Inbatad ni Kapitan Repato nga awan ti kinapudno ti akusasyon kontra kadakuada, ken nasakit ti nakem na gapu ta nasaysayaat koma no kinasarita nga immuna ti ina ti agtutubo isuna sakbay nga indanun na ti reklamo na iti radyo.
Inpasingked ni Repato a nasayaat ti trato na iti nadakamat nga agtutubo aglalo iti pannangan daytoy gapu ta saanna pulos a kayat a mabisinan.
Mainaig iti daytoy, inadmitir ni Barangay Kagawad Julius Coloma nga adda ti gundaway nga inungtan na ti agtutubo gapu ta naayam iti trabaho na ken no saanna met a dillawen ti madi nga aramid na ket isuna met ti maungtan ken boss da.
Inpaganetget na nga awan ti malagip na a binulbully na ti agtutubo ken ibilang na a pammerperdi ti akusasyon kenkuana.
Innayon na a no maipapan iti alegasyon a kwarkwartaan da ket awan ti kinapudno na gapu ta isuda pay ti mangmangted kenkuana ti kwarta aglalo ket no ti rabii ket mapan agpingpong ti agtutubo ken adda pay ti tintinnagan na nga e-bike na.
Kalikagom pay ni Coloma a maamoan no siasinno ti dakdakamaten ti ina ti agtutubo nga adda ti kagawad a nangibaga kenkuana a kastoy ti trato da iti anakna isut gapuna a pagsasaritaan da daytoy a banag iti barangay da, ngem no saan a maibaga ti pamilya ket isaklang na dagitoy uray maibus ti kwarta na.
Kabayatanna, inpalgak ni Barangay Kagawad Alla Acosta a saan da a binulbully ti agtutubo ken isuna pay a mismo ti nanggarantor idi nangiruwar ti e-bike na.
Inpaganetget pay ni Acosta a ti trato na ken ni Ramil ket arigna bukodna nga anak.
Mamati ni Acosta a ti dakdakamaten ti ina ni Ramil a barangay kagawad a nangidanun kenkuana a saan a napintas ti trato da iti anakna ket saanen nga opisyal iti barangay da ken ti laeng gagem na ket ti mangperdi kadakuada.
Maipalagip a ti nasao nga agtutubo ket inserrek da Barangay Kagawad Coloma ken Acosta iti pagtrabahoan da nga imanmanihir met ni Barangay Chairman Repato.
Immuna iti daytoy, inbutaktak ti ina ni Ramil a maluksaw unay gapu iti panangbulbully dagiti tallo nga opisyal ti barangay iti anakna isut gapuna a ginandat na ti nagpakamatay.
Inlawlawagna na a baon baonenda ti anakna uray saanen a karaman iti trabahona no sadinno a no saanna a maubra ket gandatenda a dangran.
Mamati pay ti ina a dawdawatenda pay ti kuarta ti anakna gapu ta awan ti naur-urnongna kabayatan ti maysa a bulan a panagtrabahona ken butbutngenda daytoy no saanna a tungpalen ti ibagada.
Inpeksa met ti nasao nga agtutubo ti sakit ti nakemna kadagiti nasao nga opisial ti barangay.
Inbatadna a napanunotanna ti agtrabaho ken agsardeng iti panagadal gapu ta kayatna ti makatulong kadagiti kakabsatna ken ti inana.
