LAOAG CITY – Nairekord ti maikadua a natay iti agdama a March-May climbing season ita a 2025 iti kangatoan a bantay iti intero a lubong a Mt. Everest.
Daytoyket kalpasan a pimmusay ti Indian mountaineer a nabigbig a ni Subrata Ghosh, agtawen ti 45 kabayatan ti panagbabana iti bantay kalpasan a nakadanon iti tuktok ti 29,000 feet peak ti Mt. Everest idi Huebes.
Inbatad ni Bodha Raj Bhandari ti Snowy Horizon Treks and Expedition, arig nabannog ni Ghosh ken nangipakita ti senyal ti altitude sickness.
Nagkedked ti Indian mountaineer a bumaba manipud iti Hillary Step.
Ti Hillary Step ket adda iti death zone, maysa a lugar iti nagbaetan ti walo a ribu a metro ti kangatona a South Col ken tuktok ti bantay no sadinno awan unay ti angin ken nababa ti lebel ti oxygen a nangitunda ti risgo ti altitude sickness.
Iti agdama, maikarkarigatan a maibaba ti bangkay ti natay nga Indian national nga agturong iti base camp.
Kuna ni Bhandari, maammoan ti namunganayan iti pannakatayna kalpasan ti maiwayat a post mortem.
Maipalagip nga immuna a naipadamag ti natay a Pilipino a ni Engr. Philipp II Santiago iti tawenna nga 45 idi Mierkoles.
Naammoan a nagka-engkwentro ti avalanche ti grupo ni Santiago isu a nagsagaba isuna ti injuries iti pingping ken napukawan ti puot.
Segun iti Nepal tourism department official a ni Himal Gautam, nabannog ni Santago idi nakasangpet daytoy iti Camp IV ken pimmusay kabayatan nga agin-inana iti tent-na.
Iti agdama, adda ti sumurok 50 a climbers ti balligi a nakadanon iti summit ti bantay sipod idi naluktan ti ruta iti napalabas a lawas.
Kabayatanna, iti napalabas a tawen, adda ti 800 climbers ti nakadanon iti peak ti Everest idinto nga adda ti walo nga indibidual ti natay.
