LAOAG CITY – Nakita a maysan a nalamiis a bangkay ti maysa a construction worker iti uneg mismo iti pagtaenganna iti Barangay 5 San Ramon iti ili ti Vintar.
Ti biktima ket agtawen ti 55, naasawaan ken residente iti nasao met laeng a barangay.
Basar iti Vintar Municipal Police Station, nakita ti kabsat ti biktima nga agtawen ti 61, awanan asawa, tricycle driver ken residente iti nadakamat met laeng a barangay a nakadasay ti biktima iti salas ti pagtaengan nga adda ti darana.
Iti imbestigasion dagiti otoridad, naduktalan a mammartek ti biktima ken adda ti medical history daytoy iti hypertension.
Naammoan nga agmaymaysa ti biktima nga agnanaed iti pagtaenganda.
Kabayatanna, segun iti attending physician a ni Dr. Heidi Marita Albano a ti rason ti pannakatay ti biktima ket gapu iti cardiac arrest ken awan ti nakita nga adda ti posible a foul play a napasamak iti insidente.
