LAOAG CITY – Mamati ni Atty. Chel Diokno a gapu iti tulong dagiti Millennials ken Gen Z no apay nga immuna ti Akbayan Party-List iti kaliplippas a 2025 Midterm Elections.
Segun kenkuana, basar iti panagadal, adda ti 11 a porsiento idi tawen 2022 National and Local Elections ti nagbutos a Gen Z idinto a 25 a porsiento ita a 2025 Midterm Elections.
Inbatadna a napateg ti Party-list gapu ta daytoy ti agserbi a boses kadagiti nagduduma a sektor iti komunidad kas kadagiti mannalon, mangmangged, manursuro ken dadduma pay.
Inlawlawagna a dagiti sumagmamano a gakat nga ilungalongda iti umuna a 100 nga aldaw a panagtugawna iti Kongreso ket ti pannakaipababa ti presio dagiti kangrunaan a magatgatang, ti Baon Bill wenno ti pannakaipaay ti balon dagiti estudiante a mapan iti pagadalan, pannakaipangato ti sueldo dagiti mangmangged ken dadduma pay.
Kabayatanna, inpakaammo ni Atty. Diokno a mismo a tinawagan isuna ni House Speaker Martin Romualdez tapno agbalin a maysa kadagiti House Prosecution Panel iti impeachment trial ni Vice President Sara Duterte.
