LAOAG CITY – Mangnamnama ti Eastern Visayas a makagun-od manen iti puesto para iti 2025 Palarong Pambansa.
Segun ken ni Mrs. Eden Dadap, Focal Person ti Focal Person Learner Rights and Protection ti Eastern Visayas, daytoy ket kalpasan a nagun-odda ti maikapito a puesto iti 2024 Palarong Pambansa a naisayangkat idiay siudad ti Cebu.
Inbatadna nga adda ti pakabuklan a 750 a delegates no sadinno sumurok 500 ditoy ket dagiti atleta manipud iti Eastern Visayas.
Kunana a nakasaganan dagiti amin a pambatoda nga atleta kadagiti nagduduma a tay-ak ti ay-ayam.
Innayonna a naiget ti panangakomodar ti Sta. Rosa National High School iti ili ti Sarrat kadakuada sipod idi simmangpetda ken awan met dagiti seryoso a problema ti napasaranda.
