LAOAG CITY – Kiniddaw ni Presidente Ferdinand Marcos Jr., ti courtesy resignations kadagiti amin a cabinet secretaries a maysa nga addang tapno i-calibrate ti administrasionna kagiddan ti saan a napintas a resulta iti napalabas nga eleksion.
Inbatadna a panawenen tapno i-realign ti gobierno a namnamaen dagiti tattao.
Inpettengna a saan daytoy a business as usual gapu ta nagdesisionen dagiti tattao ken namnamaenda ti resulta a saan ketdi ti pulitika.
Basar iti Palasyo, ti kiddaw a courtesy resignation ket gagem a maipaayan ti gundaway ti Presidente nga i-evaluate ti performance ti tunggal departmento ken tingitingen no asino pay ti agtuloy nga agserbi iti administrasion iti maipatungpal a recalibrated priorities.
Inlawlawag ti Presidente a daytoy ket saan a maipanggep iti personalidad no diket maipapan iti performance-na.
Ti nasao nga addang ket agturong iti ad-adda nga agpokus iti performance driven approach.
Kuna ni Presidente Marcos a ti ad-adda a kasapulan ita ket ti napaspas a pannakaipatungpal kadagiti napapateg a proyekto ken programa ti administrasion.
Inpasingked met ti Malakanyang saan a maitantan ti serbisio ti gobierno kagiddan ti panawagan a courtesy resignation dagiti cabinet secretaries.
Iti nasao nga addang ti Presidente ket pakalasinan ti baro a rupa ti administrasionna nga agbalin nga ad-adda a sharper, faster ken fully focused iti kinasapulan dagiti umili.
Kabayatanna, naladingit nga inrakurak ni Department of Transportation (DOTr) Secretary Vince Dizon ti courtesy resignation daytoy.
