LAOAG CITY – Nakigtot ni dati nga Overseas Workers Welfare Administration (OWWA) adminstrator Arnell Ignacio ti panangipila kenkuana ti kaso gapu iti panaggatang ti ahensia ti P1.4 bilyon a balor ti daga.
Inbatadna nga idi pay 2018 kabayatan a deputy administrator daytoy idi rimmuar ti plano a panaggatang ti daga.
Kaduana dagiti sumagmamano nga opisial ti Overseas Workers Welfare Administration iti panagdengngeg iti Senado mainaig iti nasao a banag.
Inpettengna nga awan ti aniaman nga iregularidad ti nasao a kontrata gapu ta inpakaammoda pay daytoy iti Department of Budget and Management idinto a ti gatangen a daga iti paset Ninoy Aquino International Airport (NAIA) Terminal 1 ket mismo ti LandBank ti nangisayangkat ti evaluation no sadinno a nakaalda ti permit iti Civil Aviation Authority of the Philippines (CAAP).
Naammoan a ti nasao a daga ket panangipatakderan koma ti paginanaan dagiti agaw-awid nga Overseas Filipino Workers (OFW).
