LAOAG CITY – Mangipapaay ti maysa a tricycle driver a ni Mr. Ronald Allan Tacsuan manipud iti siudad ti Batac ti libre a panangilugan kadagiti atleta ken delegado ti Palarong Pambansa 2025.
Segun kenkuana, malaksid kadakuada ket libre pay ti panaglugan dagiti manursuro ken staff ti lokal a gobierno iti siudad ti Batac ken iti gobierno probinsial ti Ilocos Norte nga agserserbi para iti nasao a naindaklan nga aktibidad.
Inbatadna nga apaman a nangiparuk-at ti fare guide ti Metro Ilocos Norte Council tapno maliklikan ti panag-overcharging wenno nangina a panangsingir ti plete kadagiti maseknan nga atleta ken delegado ti Palarong Pambansa ket napanunutanna nga idiaya a libre ti panagpasada daytoy.
Inlawlawagna nga addan ti sumurok-kumurang 50 nga atleta ken delegado ti Palarong Pambansa ti nailugannan a pasahero nga awan ti singsingirenna a plete dagitoy.
Mainaig iti daytoy, dinayaw dagiti atleta ken delegado a nagbalin a pasahero ni Mr. Tacsuan ti ar-aramidenna a libreng sakay para kadakuada.
Innayonna nga agtultuloy ti panangiluganna kadagiti atleta ken delegado ti Palarong Pambansa agingga nga agngudo iti naisangsangayan nga aktibidad ti probinsia.
Kabayatanna, naammoan a ti terminal ni Mr. Tacsuan ket iti Catalino Acosta Memorial Elementary School no sadinno a daytoy ti agserserbi a billeting quarters dagiti atleta ken delegado manipud iti Calabarzon Region.
