LAOAG CITY – Inpakaammo ni Mrs. Shirley Agsunod, School Principal IV ti Ilocos Norte College of Arts and Trades a ngimmato ti bilang dagiti estudiante iti kada klasrum ita a tawen.
Segun kenkuana, manipud iti dati nga arup 38 agingga iti 40 ti bilang dagiti agad-adal iti kada klasrum ket nagbalin daytoyen nga agarup 45 agingga iti 46.
Inbatadna a daytoy ket kalpasan a ngimmato ti bilang dagiti enrollees iti nasao a pagadalan kangrunaanna kadagiti Grade 7 students a manipud iti dati nga agarup sumurok 600 ket itan ket dumanonen iti 726.
Inlawlawagna a dakkel ti posibilidadna a manayonan pay ti agdama a bilang dagiti enrollees iti pagadalanda gapu kadagiti naladaw a nag-enroll.
Innayonna nga awan met ti nagbalin a seryoso a problema kabayatan ti umuna nga aldaw a panaglukat ti klase.
