LAOAG CITY – Naidasar iti Sangguniang Panlungsod ditoy siudad ti Laoag ti pannakaamendar ti sumagmamano a probision ti Milestone Awards kadagiti senior citizens.
Segun ken ni Sangguniang Panlungsod Member Handy Lao, daytoy ket maipanggep iti panag-lapse-na ti 60 nga aldaw no saan pay a maala ti maysa nga awardee kalpasan ti panagkasangayna.
Inbatadna a ti gagemna ket tapno ad-adda a maipayalisto a maawat dagiti benepisiario isu nga adda ti pannakabalbaliwna.
Inlawlawagna nga apaman a maipila ti milestone awards dagiti senior citizens ket masapul a maited kadakuada iti uneg ti 60 nga aldaw.
Innayonna nga adda ti nagbalin a parikot ti pannakaipatungpalna manipud iti City Social Welfare and Development Office ken nagyaman isuna gapu ta inendorsar daytoy kenkuana tapno maiyurnos sakbay pay nga aggraduar daytoy iti posision.
Kabayatanna, epektibo daytoy no ti panagkasangay ti awardee ket manipud Enero 2025 agpapan kadagitoy a gundaway ngem no tawen 2024 ket saanen a mabalin a maipila.
