LAOAG CITY – Nagtalinaed ti takder ti sumagmamano nga Overseas Filipino Workers idiay Israel a saan da nga agawid ditoy pagilian iti baet nga adda ti inkari ti gobierno ti Pilipinas a tulong para kadakuada.
Inrakurak ni Bombo International News Correspondent Elvie Aviador Pregua iti Israel a mabalin nga umanamong da laeng nga agawid ditoy Pilipinas no mismon a ti gobierno ti Israel ti mangibaga a kritikalen ti sitwasyon iti nadakamat a pagilian.
Kuna na pay a ti laeng tungpalen da ket ti gobierno ti Israel no sadinno a no ibalakad na a kasapulan nga agbakwit dan nga Overseas Filipino Workers ket aramiden da a dagus.
Inpaganetget ni Pregua nga uray adda ti inkari ti gobierno ti Pilipinas a tulong para kadagiti Overseas Filipino Workers nga agawid ditoy pagilian ket saan a makaumanay aglalo no adda ti pagad-adalen da nga annak isut gapuna a kaykayat da latta ti agtalinaed iti Israel.
Innayon na a ti maibagbaga nga inkari ti gobierno ti Pilipinas a tulong pinansyal ket sweldo da laeng ti makabolan iti ayan da a pagilian isut gapuna a saanda a mapanunot ti agawid ditoy pagilian iti baet ti kumarkaro a tensyon iti nagbaetan ti Israel ken Iran.
Mainaig iti daytoy, masdaaw pay ni Pregua iti panangipangato ti gobierno ti Pilipinas iti Alert Level 3 iti Israel idinto nga isuda a mismo nga agtrabtrabaho iti nadakamat a pagilian ket arigna normal laeng para kadakuada ti sitwasyon.
Inpakaammo na pay a nawaya da latta a rumuar iti pagtaengan da laketdi ammo no sadinno ti ayan dagiti bomb shelter tapno adda ti pagtarayan a dagus no adda ti maawat da a ballaag wenno mangngeg da ti siren a mangipasimudaag nga adda manen ti inpabanto a missiles wenno rockets ti Iran.
