LAOAG CITY – Naragsak nga inpakaammo ni Dr. Rickson Balalio, mangidadaulo ti Provincial Health Office a napukawen ti stigma seknan iti Human Immunodeficiency Virus kadagiti komunidad ditoy probinsia.
Inbatadna a napintas daytoy a senyales gapu ta saanen nga agamak wenno agbuteng dagiti umili a dumalan iti Human Immunodeficiency Virus wenno HIV Testing.
Inlawlawagna a no nasapsapa a maduktalan iti panagpositibo ti maysa nga indibidual ket malappedan ti panagwaras ti virus.
Kunana nga adda dagiti libre nga agas nga ipapaay ti HIV Treatment Hubs kas ti Mariano Marcos Memorial Hospital and Medical Center iti siudad ti Batac a mabalin a gundawayan dagiti maseknan nga indibidual.
Inpasingkedna nga agbalin a confidential ti resulta dagiti dumalan iti HIV Testing isu nga awan ti rumbeng a pagdanagan wenno pagbainan.
Immuna iti daytoy, balligi ti pannakaisayangkat ti HIV Testing iti Provincial Auditorium iti kallabes.
