LAOAG CITY – Nabara a sinarabo dagiti empleado ti lokal a gobierno ditoy siudad ti Laoag ni Mayor James Bryan Alcid.
Daytoy ket kagiddan ti umuna nga aldaw a pormalen a panagtugawna kas Local Chief Executive ditoy siudad ti Laoag.
Insigida a nagpirma ni Mayor Alcid kadagiti nagduduma a dokumento apaman a nakastrek iti Conference Hall.
Nakitaripnong daytoy kadagiti Department Heads kadagiti nagduduma nga opisina ti lokal a gobierno.
Inrakurakna a mapagbalin a centralized hotline ti City Disaster Risk Reduction and Management Office tapno maymaysa laeng ti mabalin a kontaken a numero ken al-alisto ti koordinasion kadagiti agkiddaw ti tulong.
Kalikagumna a manayonan ti ambulansia ditoy siudad tapno adda ti umdas nga ambulansia a nakasagana nga agresponde kadagiti mapaspasamak.
Inbatadna a masapul a maadal a naimbag ti garbage collection schedules gapu ta maipagarup a maminsan laeng iti uneg ti dua a lawas ti panagkolektar kadagiti basura.
Kunana a naiget a maitandudo ti pannakaipatungpal ti waste segregation ken climate change strategies.
Inlawlawagna nga ad-adda pay a mapapintas ken mapasayaat ti Laoag City Public Market and Commercial Complex kangrunaanna kadagiti silaw ken comfort room daytoy.
Mainaig iti daytoy, inpakaammo ni Mayor Alcid nga adda dagiti mabalbaliwan iti Laoag City General Hospital tapno ad-adda a napintas ti pannakaipadanon ti serbisio medikal kadagiti pasiente.
Inpanamnamana a maminsan manen nga agballigi ditoy siudad ti Laoag ti Tan-ok of Festival of Festivals.
Innayonna ti pannakaiplastar dagiti drainage canals, solar lights, Aurora Park, Gilbert Bridge ken dadduma pay.
Kabayatanna, pinirmaan ni Mayor Alcid ti kaunaan nga Executive Order-na kas Local Chief Executive nga Executive Order No. JBA-001 wenno ti tagline ti lokal a gobierno ditoy siudad ti Laoag nga “Alisto, Asenso ken Progreso.”
