LAOAG CITY – Kinumpirmaran ni United States President Donald Trump nga immannugoten ti Israel kadagiti kondision para iti 60 nga aldaw a tigil-putukan idiay Gaza ken inpettengna iti Hamas nga awaten ti katulagan sakbay pay a kumaro ti situasion.
Agsagsagana ni Trump tapno makitaripnong ken ni Israeli Prime Minister Benjamin Netanyahu iti White House inton Lunes, Hulio 7 a gagem a tulungan ti dua a grupo nga agtulag para iti pannakawaya-waya dagiti hostage.
Inbatad ni Trump, ti Qatar ken Egypt ti mangipila ti pinal a proposal nga awaten ti Hamas ngem no saanna daytoy nga awaten ket mabalin a kumaro iti situasion iti rehion.
Saan met a dinakamat ni Netanyahu dagiti detalye ti panagbisitana iti Washington malaksid iti trade deal ken isyu idiay Iran.
Iti baet a positibo ti rakurak, arig adda ti panagdudua latta ti Hamas iti indiaya ni Trump nga inawaganna kas “best and final offer.”
Maipalagip a naminsanen a napaay ti panagsinnarita gapu ta saan nga agsinnurotan ti dua a grupo iti panaglippas ti gubat kas paset ti ceasefire.
Kagiddan daytoy, adda ti naiyuswat a taripnong ni Israeli Minister for Strategic Affairs Ron Dermer iti Washington mainaig iti posible a tigil-putukan idiay Iran ken dadduma pay.
Kabayatanna, sumurok 150 nga international humanitarian groups ti nagpanawagan nga isardengen ti kontrobersial a sistema ti panangipaay ti tulong iti Gaza gapu iti riribuk ken kumarkaro a kinaranggas.
Nagballaag ni Defense Minister Israel Katz kontra iti missile attack idiay Yemen manipud iti Iran-backed Houthi rebels kalpasan ti 12 nga aldaw a rinnupak.
