LAOAG CITY – Inpakaammo ni Barangay Chairman Oliver Ralieca iti Barangay Nalasin iti ili ti Paoay a sinukatan na ti Barangay Treasurer da kalpasan nga innala na ti pondo iti barangay da para iti personal a kasapulan na.
Inbatad na a naduktalan da a naminduan a daras nga inaramid daytoy ti barangay treasurer no sadinno nga idi damo a panangala na ket saan pay nga isuna ti kapitan iti barangay da.
Kuna na nga iti maikadwa a gundaway a panangala ti barangay treasurer ti pondo ti barangay nga umabot iti 160 ribo a pisos ket idi Marso ita a tawen ngem naduktalan da laeng ti inaramid na idi Hunyo.
Iti baet ti inaramid ti barangay treasurer ket pinakawan da daytoy ken kuna ni Barangay Chairman Ralieca a saan nan a pilaan ti reklamo gapu ta maasyan ken naisubli na metten ti innala na a pondo ti barangay da.
Innayon ni Ralieca a kalikagom ti barangay treasurer ti agtalinaed iti pwesto ngem saannan a kayat pay aglalo ket adda ti gundaway a tinulad ti maseknan ti pirmana.
