LAOAG CITY – Inpakaammo ni Dr. Melvin Manuel, mangidadaulo ti City Disaster Risk Reduction and Management Office a maibilang a beneficial para kadagiti mannalon ti mapaspasaran nga agsasaruno a panagtudtudona.
Inbatadna a dakkel daytoy a benepisio para kadagiti mannalon nangruna ket panawen pay laeng ti panagmulada kadagiti nagduduma a produkto agrikultura.
Inlawlawagna a ti maximum a rainfall ket dumanon iti 600 millimeters ngem iti agdama basar iti datosda ket adda pay laeng iti 317 millimeters.
Kunana nga idi bulan ti Hunio ket nagkurang ti probinsia ti 80 millimeters a panagtudona.
Mainaig iti daytoy, inpasingked ni Dr. Manuel a kanayon a nakasagana ti opisinada kas direktiba kadakuada ni Mayor James Bryan Alcid a nasken nga alisto ti panangrespondeda kadagiti agkasapulan.
Kabayatanna, naka-preposition dagiti amin a rescue equipment a mausar para iti rescue operation no bilang kumaro ti sasaaden ti panawen.
