LAOAG CITY – Inrakurak ti Malakanyang a nasken a maiwayat ti naun-uneg nga imbestigasion mainaig iti kaso dagiti mapukpukaw a sabungero.
Daytoy ket kalpasan a rimmuar iti intelligence report a posible a maipagarup nga adda ti pakainaiganna dagiti sumagmamano a personalidad a karaman iti war on drugs idi administrasion ni dati a Presidente Rodrigo Duterte.
Inbatad ni Palace Press Officer ken Presidential Communications Office (PCO) Undersecretary Claire Castro a suportado ni Presidente Ferdinand Marcos Jr. ti pannakaipalawa ti imbestigasion tapno maduktalan ti sibubukel nga insidente.
Inlawlawag ni Castro nga awan ti panangideklararda nga adda ti guilty iti napasamak ngem naiget ti takder ni Presidente Marcos a maipaayan ti hustisia dagiti biktima.
