LAOAG CITY – Linappedan ti Judge idiay Estados Unidos ti panangipatungpal ni United States President Donald Trump iti panaglippasen ti birth right citizenship kadagiti sumagmamano a residente idiay Amerika.
Inaprobaran ti New Hampshire judge ti class action lawsuit kontra iti executive order ni Trump ken laplappedanna ti Presidente nga ipatungpal iti daytoy.
Ti nasao a class action lawsuit ket indauloan ti American Civil Liberties kas mangibagi kadagiti nagannak ti immigrant ken dagiti annakda.
Nakasagana a kuestionaren ti White House ti validity ti ruling ti judge.
Agbalin nga epektibo koma ti panangipawil ni Trump ti birth right citizenship inton Hulio 27.
Maipalagip a nailanad iti Konstitusion ti Estados Unidos a garantisado ti United States citizens dagiti amin a maladaga a naipasngay idiay Amerika ngem kalikagum daytoy nga ikkaten ni Trump nangruna kadagiti nagannak dagiti ubbing a maibilang nga undocumented immigrants ken gangannaet a bisita.
