LAOAG CITY – Inlawlawag ti Department of Justice nga awan pay ti kumpirmasyon no pudno a tultulang ti tao ti narekobre iti paset ti Taal lake.
Segun ken ni Justice Assistant Secretary ken Spokesperson Mico Clavano, possible a saan a tulang ti buto ti tao ti karga dagiti sako a narekobre ti Philippine National Police ken Philippine Coast Guard.
Daytoy ket kalpasan ti naiyuswat a ‘search and retrieval operations’ iti Taal lake tapno biruken ti maipagarop a bangkay dagiti mapukpukaw a mammallot.
Kuna pay ni Clavano a likliklikan ti Department of Justice nga ipangato ti ‘expectation’ na gapu ta saan pay a naan-anay a masigurado no ania ti pudno a karga dagiti sako.
Nupay kasta, mangnamnama ti ahensya nga aramiden amin ti Philippine Coast Guard ti kabaelan da para iti operasyon a narugyan mainaig iti kaso dagiti mapukpukaw a mammallot.
Maipalagip a naiyuswat ti panagbatok dagiti kameng ti Philippine Coast Guard iti paset ti Taal lake kalpasan nga inbutaktak ti testigo a ni Julie ‘Dondon’ Patidongan wenno alyas Totoy nga iti lugar ti nakaibellengan dagiti mapukpukaw a mammallot.
Mainaig iti daytoy, inrakurak ni Justice Spokesperson Clavano a dagiti narekobre a sako iti Taal lake ket plano a maipadalan ti naan-anay a pannakainspeksyon no sadinno nga inpatuluden ti ahensya dagiti kameng ti National Bureau of Investigation ken dagiti piskal tapno agbalin a ‘witness’ iti naisayangkat a search and retrieval operation.
Innayon ni Clavano a possible nga umabot ti maysa agingga iti dua nga aldaw sakbay a maestablisar ti karga dagiti sako iti maiyuswat a forensic examination.
