LAOAG CITY – Natakawan ti maysa nga empleado ken maysa a Government Internship Program ti Community Affairs Office iti lokal a gobierno ditoy siudad iti Laoag.
Segun ken ni Ms. Vilma Rances, mangidadaulo iti nasao nga opisina, manarimaan ti pannakaisayangkat ti flag raising ceremony idi napasamak ti insidente.
Inbatadna a basar iti ala ti Close Circuit Television wenno CCTV camera, adda ti maysa a balasang a simrek iti ridaw ti Sports Office ken nagturong daytoy iti Community Affairs Office.
Inlawlawagna a natakaw ti maysa a ribu a pisos a kukua ti maysa a Government Internship Program ken uppat a ribu a pisos a kukua ti maysa nga empleado a ni Mariel Aquino.
Kunana a ti suspek ket maysa a menor de edad nga agtawen ti 14 ken residente ti Barangay 2 ditoy siudad ti Laoag.
Innayonna nga iti agdama ket manarimaan ti panangbirukda iti nasao a suspek.
