LAOAG CITY – Tumultulong ti lokal a gobierno ditoy siudad ti Laoag ti panangsaluad ti salun-at kangrunaanna ti mental health dagiti agtutubo iti siudad.
Segun ken ni Ms. Perlita Cabello, mangidadaulo ti City Social Welfare and Development Office ditoy siudad ti Laoag a daytoy ket babaen ti pannakaiyuswat ti advocacy training para kadagiti agtutubo, pakairamanan dagiti Out-of-School Youth (OSY) iti siudad.
Kunana a ditoy ket naipaadal kadakuada no ana ti aramiden dagiti addaan ti problema ti mental health-na.
Mainaig iti daytoy, inbatad ni Cabello a daytoy nga aktibidad ket nangipadanon ni Laoag City Mayor James Bryan Alcid ti mensahena babaen ken ni Hon. Jaybee Baquiran a dagiti agtutubo ket kangrunaan a napagsasaritaan maipanggep iti mindfulness, stress management wenno ania dagiti wagas tapnu maliklikanda ti depression ken nakaro a pannakaapektar no adda sumamangbay kadakuada a problema.
Kabayatanna, innayon pay ni Cabello a malaksid kadagitoy ket naipaadal pay kadakuada ti karebbengan ken responsibilidadda kas maysa nga agututubo saan laeng ditoy siudad no diketdi kas maysa nga agtutubo ditoy pagilian.
