LAOAG CITY – Inawat ti negosiante a ni Atong Ang ti pormal a panangipila dagiti kaso kontra kenkuana mainaig iti maipagarup a pannakairamanna iti kaso dagiti mapukpukaw a mammallot.
Daytoy ket kagiddan ti panangipila dagiti pamilia dagiti mapukpukaw a mammallot ti multiple counts of murder ken serious illegal detention charges kontra ken ni Ang ken dagiti kakaduana.
Iti maysa nga statement nga inruar ti abugadona a ni Atty. Gabriel Villareal, inbatad ni Ang a nakasagana isuna a sungbatan dagiti alegasion a maiyak-akusar kenkuana iti legal forum.
Inpetteng ni Ang nga inosente daytoy ken nagballaag iti testimonia ti self-proclaimed whistleblower a ni Julie Patidongan alyas Totoy nga inladawanna a depekto, bukud nga interes ken awan ti ebidensiana.
Inlawlawagna a maipagarup a naaramid ni Patidongan nga ag-level up manipud iti panagbalinna a robbery syndicate agingga iti panagpatarayna ti bukudna a criminal network kas ti iligal a sugal, kidnapping ken dadduma pay.
Kuna ni Ang nga idi nairaman ni Patidongan iti pannakapukaw ti maysa a kalaban iti pallot idiay Manila iti maudi a paset iti napalabas a tawen, nagbuteng isuna a maibutaktak dagiti basolna.
Gapu iti daytoy, inpalgakna nga itudtudo ni Patidongan dagiti superior-na kas akin-utek iti estoria nga inaramid laeng ni alyas Totoy tapno saan a sumango iti pannusa kadagiti inaramidna a krimen.
Maipalagip nga immunan nga intudo ni Patidongan da Ang ken aktres a ni Gretchen Barretto a maipagarup nga adda iti likudan ti pannakapukaw dagiti mammallot banag a naiget a naglikudan ti dua.
