LAOAG CITY – Naideklarar kas protective landscape ti Paoay Lake iti ili ti Paoay babaen iti panangpirma ni Presidente Ferdinand Marcos Jr. ti Republic Act No. 12230.
Gapu iti daytoy, namnamaen ti lokal a gobierno iti ili ti Paoay nga idadauloan ni Mayor Shiela Galano nga ad-adu manen dagiti turista a bumisita iti nasao nga ili gapu iti pannakaideklarar ti Paoay Lake kas protected landscape iti intero a pagilian a Pilipinas.
Segun kenkuana, dakkel a pakaidayawan iti ili ti Paoay ken probinsia iti nasao a banag ket ad-adda manen a makagutigot ti ad-adu pay a turista.
Inbatadna a dakkel ti tulong ni Ilocos Norte 2nd District Rep. Angelo Marcos Barba gapu iti panangitandudona iti pannakatagiben iti aglawlaw.
Inlawlawagna a babaen iti naipasa a linteg ket ad-adda manen a mapapintas ti nasao a lugar.
Innayonna nga iyur-uray pay laeng ti lokal a gobierno dagiti pagannurotan nga isu ti adaptarenda para iti naan-anay a pannakatagiben ken pannakapapintas pay ti Paoay Lake.
