LAOAG CITY – Nabilin dagiti sidewalk vendors ditoy siudad ti Laoag a temporario a mapanda pay laeng nga agpuesto iti uneg ti Laoag City Public Market and Commercial Complex agingga nga awan pay ti umiso a pagpuestoan dagitoy.
Segun ken ni Ms. Eva Marie Dumlao, Licensing Officer III ti Business Permit and Licensing Office ditoy siudad ti Laoag, saanda nga inikkan ti permit dagiti sidewalk vendors gapu ta maipawil ti aglako kadagiti pagdalanan dagiti tao.
Inbatadna a dagiti dalan ket nairanta a pagnaan dagiti agturong iti merkado publiko saan a pangikabilan wenno pagpuestoan dagiti aglako.
Inlawlawagna nga uray dagiti adda ti puestona a naka-display iti sango dagiti lakona nga arig maserraan ti dalan ket maipawil pay dagitoy.
Kunana nga amin dagitoy ket nabagaan gapu ta kitkitaenda laeng iti pagsayatan ti tunggal maysa.
Innayonna nga ikarigatanda ti mangkita iti umiso a pagpuestoan dagiti sidewalk vendors tapno makalakoda met laeng a nasayaat ken naur-urnos iti kitada nga aglako iti tiendaan.
