LAOAG CITY – Mangisayangkat ti emergency meeting ti European Union sumagmamano nga aldaw sakbay ti maiyuswat a taripnong da United States President Donald Trump ken Russian President Vladimir Putin.
Daytoy ket kalpasan a madanagan dagiti European foreign ministers a saan a mairaman iti panagtaripnong ni Ukrainian President Volodymyr Zelensky.
Inpetteng ti European Union ti kinapateg iti pannakipagpaset ti Ukraine gapu ta isuda ti addaan ti tulbek para iti naan-anay a panaglippas ti gubat a nagpauten iti uneg ti uppat a tawen.
Maipalagip a maisayangkat ti taripnong da Trump ken Putin inton aldaw ti Sabado idiay Alaska.
Immuna iti daytoy, inrakurak ni Trump a kalpasan ti panagtaripnong da Putin ket insigida a tawaganna ni Zelensky ken dagiti lider ti European Union mainaig iti nasao a panagsarita.
