LAOAG CITY – Natay ti maysa a menor de edad kalpasan nag ala-superman ken naidungpar iti kotse ken pader ti maysa a bakante a pagtaengan iti Barangay Bil-loca iti siudad ti Batac.
Segun ken ni P/Capt. Angeline Aguinaldo, Deputy Chief of Police ti Batac City Police Station, ti biktima ket maysa a meat vendor ken residente iti Barangay Patong, Magsingal, Ilocos Sur.
Inbatadna a basar iti inwayatda nga imbestigasion, kabayatan a dumaldalyasat ti driver ti motorsiklo a Suzuki Raider 150 nga agturong nga agpa-amianan ket napukawan ti kontrol ti manibela.
Gapu iti daytoy, kunana a nadungpar ti nakamotorsiklo ti naka-parking a kotse agingga a naidungpar pay iti pader ti maysa a bakante a pagtaengan.
Inlawlawagna a nagsagaba ti nakana a sugat ti biktima kangrunaanna iti ulona gapu ta saan a nagusar ti protective helmet idi napasamak ti desgrasia.
Mainaig iti daytoy, inpakaammo ni P/Capt. Aguinaldo a naitaray iti Mariano Marcos Memorial Hospital and Medical Center iti siudad ti Batac ti biktima ngem naideklarar a dead on arrival.
Innayonna a nabartek ti biktima gapu ta naglibas daytoy a naginom kaduana dagiti pagayamna.
