LAOAG CITY – Inbatad ni Vice Mayor Rey Carlos Fariñas a kasapolan ti istrikto nga implimentasyon ti panag-checkpoint dagiti kameng ti Philippine National Police ditoy ciudad ti Laoag.
Daytoy ket gapu ta kaadoan kadagiti karaman iti disgrasya ditoy ciudad ti Laoag ket adda iti impluwensia ti nasanger.
Segun iti bise mayor, masapol a mamandar dagiti otoridad nga ag-checkpoint iti disoras ti rabii tapno mamonitor dagiti driver nga addaan iti impluwensia ti arak.
Kunana nga awan iti mangayat iti disgrasya ngem no naiget iti maipatungpal a checkpoint ket mabalin a makaliklik iti aniaman nga insidente dagiti motorista.
Mainaig iti daytoy, inbalakad ti bise mayor a no nakainom iti arak ket saanen a gandaten pay ti agmaneho.
Innayon na a nasaysayaat no agpasahero wenno agpaitulod lattan iti taxi wenno tricycle tapno makaawid a natalged iti pagtengan.
