LAOAG CITY – Kalikagom ni Presidente Ferdinand Marcos Jr. a maipa-blacklist ti SYMS Construction Trading a contractor iti flood control project iti Barangay Piel, Baliwag, Bulacan.
Segun iti Presidente, malaksid iti pannakai-blacklist, sumango pay kadagiti kaso ti nasao a kumpanya iti babaen ti Revised Penal Code ken Republic Act 3019 wenno Anti-Graft and Corrupt Practices Act.
Inpasigurado ti presidente a saanna a palabsen ti nasao nga anomalya ken inkari na a masuspenso ken makasoan pay amin nga opisyal a nagkukunsabo.
Innayon na a sangwen dagitoy ti panaglabsing iti Anti-Graft and Corrupt Practices Act, malversation of public funds, ken falsification of public documents.
Naamoan nga umabot iti ₱55 milyon ti binayadan ti gobyerno para iti maysa a concrete river wall project iti Brgy. Piel, ngem iti panaginspeksyon ti presidente ket awan pulos ti naipatakder a pader wenno uray maysa laeng koma nga hollow block.
Inpalgak pay ni Presidente Marcos a saan a nakalista iti flood control projects ti Department of Public Works and Highways (DPWH) ti nasao a proyekto.
