LAOAG CITY – Mamati ti Malakanyang nga unconstitutional ti inlungalong a gakat ni Senator Robinhood Padilla a gagem na ti mangipatungpal ti tinawen a mandatory drug testing para iti amin a naelektaran ken nadutukan nga opisyal ti gobierno.
Iti babaen ti gakat, ibligado a dumalan dagiti opisyal iti agpada nga hair follicle test ken urine test iti kada tawen.
Segun ken ni Palace Press Officer Claire Castro, saan nga agtugma daytoy iti nagbalin a desisyon ti Korte Suprema idi 2008 iti kaso a Social Justice Society vs. Dangerous Drugs Board.
Basar iti nasao a desisyon, mailabsing iti Konstitusyon ti universal wenno mandatory drug testing gapu ta mailabsing daytoy iti karbengan ti maysa a tao ken iti privacy dagiti indibidwal.
Kuna na a ti laeng ipalubos ti linteg ket ti panangiyuswat ti random drug testing.
Gapu iti daytoy, inbalakad ni Castro iti Senador nga adalen na nga umuna ti ipilpila na a gakat gapu ta amangan no agsayang laeng iti oras ken pondo.
