LAOAG CITY – Inpakaammo ni Konsehal Jeff Fariñas, chairman ti Committee on Housing and Urban Development a naan-anayen a napakonektaran ti supply ti kuryente ti 14 a pamilya iti Sitio Maharlika, Brgy. 1 ditoy ciudad ti Laoag.
Nagyaman ni Fariñas ken ni Acting General Manager Perry Martinez iti Ilocos Norte Electric Cooperative gapu ta pinatgan na a dagus ti kiddaw da a makonektaran ti kuryente ti nasao a lugar.
Malaksid iti daytoy, kuna ti konsehal a naipakaammo kenkuana nga adda ti plano ti kooperatiba a mangpasilaw kadagiti nadakamat a pamilya kagiddan ti pannakaiyuswat ti simple a seremonya iti umay a lawas.
Inlawlawag na a ti inusar da a pondo iti panagpakonektar da ti linya ti kuryente iti lugar ket naggapo iti City Social Welfare and Development Office.
Kabayatanna, inlungalong ni Presiding Officer/ Vice Mayor Rey Carlos Farinas iti pannakaaramid ti Resolution of commendation para kenni Martinez gapu iti alisto a panagtignay ti kooperatiba iti kiddaw da.
