LAOAG CITY – Saanen a gumatang ti National Food Authority ditoy probinsia kadagiti irik a naapit idi Marso ken Abril ita a tawen.
Segun ken ni Engr. Jonathan Corpuz, Branch Manager ti National Food Authority – Ilocos Norte Branch, kaaduan kadagiti napan kinita dagiti qualifiers-da nga irik a naapit kadagiti nasao a bulan ket infested wenno nadadael.
Inbatadna a ti kapintasan a gatangenda ket dagiti kaap-apit laeng.
Inlawlawagna a ti rason no apay nga infested dagiti irik ket gapu kadagiti sako a nausar nangruna no saan a kabbaro.
Inadmitir met ni Corpuz a maibayag ti panaggatangda gapu iti kinaadu dagiti aglako ken saanda a magabenan nangruna ket mapunpunno ti bodegada.
