LAOAG CITY – Dukduktalen ti Philippine National Police iti ili ti Dumalneg no ania a klase a dinamita ti bimtak nga isu ti nakasugatan dagiti dua nga indibidual iti Barangay Quibel.
Segun kenni Police Captain Jun Medina, chief of police iti ili ti Dumalneg, iti inisyal nga inbatad ti Explosive Ordnance Disposal ket maus-usar iti iligal a panagkalap ti nadakamat a dinamita.
Inlawlawag na nga iti agdama ket aguk-ukkon da pay laeng dagiti dadduma nga impormasyon ken no adda ti witness tapno maamoan no ania ti pudno a napasamak.
Ammoen da pay no pudno ti istorya dagiti dua a biktima a napan da nagala ti pakpako iti bantay ken nakita da laeng ti dinamita iti igid ti karayan gapo ta no maduktalan a saan nga husto daytoy ken no kukua da ti dinamita ken adda ti plano da a mangiyuswat ti iligal a panagkalap ket pilaan da ti kaso.
Daytoy ket gapo ta basar iti impormasyon a naala da manipud iti Adams Municipal Police Station nga ummuna a nagresponde ket awan ti nakita da a pakpako ken uray laeng kuma ti pangipan da iti daytoy.
Maipalagip a nagsagaba ti sugat dagiti biktima nga isuda Marcelino Agbangog Manuel, agtawen ti 53, awanan ti asawa ken ni Joel Duriquen Cabradilla, agtawen ti 46, naasawaan, agpada dagitoy a mannalon ken residente iti Barangay Poblacion 1 iti ili ti Adams kalpasan a bimtak ti dinamita napidot da a dinamita iti Bolo River iti iti Barangay Quibel iti ili ti Dumalneg.
Naamoan a gapo iti panagbettak ti dinamita ket naputed ti ima ni Manuel idinto a napited met dagiti ramay ni Cabradilla.
Iti agdama, addan iti nasayaat a kasasaad dagiti biktima nga adda iti Mariano Marcos Memorial Hospital and Medical Center iti ciudad ti Batac.
