LAOAG CITY – Nangisayangkat dagiti Sangguniang Panlalawigan ti Capitol Express iti ili nga Adams.
Daytoy ket gapu ta nagtulaganda Vice Governor Matthew Marcos Manotoc ken Governor Cecilia Araneta Marcos a masapul nga makikaysada iti pannakaipaay ti tulong kadagiti kailian iti Adams.
Inbatadda nga adda ti utang ti Provincial Government of Ilocos Norte kadagiti kailian iti ili nga Adams kangrunaan kadagiti agnanaed iti ancestral domaine daytoy.
Inpakaammo pay ti Governor a nabayagen daytoy a problema ken nairugi a naitrabaho bayat ti panagbalinna a gobernador a saan pay a naileppas ti pannakaititulo ti daga a nakaipatakderan ti balay dagiti maseknan.
Impasiguradona nga ikarigatan ti Provincial Government of Ilocos Norte (PGIN) iti babaen ni Governor Marcos pakairamanan da Mayor Homer Domingo ti ili nga Adams ken ni Hon. Cheryll Tabangay tapno magun-od ti nasao a kalikagum.
Kabayatanna, kiniddawna ti tulong ti mayor iti pannakaipaay ti naan-anay a tulong kadagiti agmulmula ti cacao kangrunaan ket basar iti pannakisarsaritana kadagiti eksperto ket ti Adams ti kapintasan a lugar a pakaimulaan ti cacao.
Innayonna a masapul a saan laeng a ti panagmula ti cacao ti mapasayaat ngem pakairamanan ti pannakaiproseso ti nasao a produkto pakairamanan ti kape ken dagiti mula a berries.
