LAOAG CITY – Inruar ti Department of Justice (DOJ) ti subpoena da Charlie Atong Ang, Gretchen Barretto ken 60 pay nga indibidual mainaig iti kaso ti missing sabungeros.
Narugyan metten nga iserbi ti Department of Justice ti process server dagiti subpoena idi rabii ken naitultuloy ita nga aldaw.
Karaman pay iti naiparuk-atan ti subpoena da dati nga National Capital Region Police Office chief Jonnel Estomo ken 18 a pulis kasta met ti whistleblower a ni Julie “Dondon” Patidongan ken ti kabsat na a ni Elakim.
Daytoy ket para iti preliminary investigation kadagiti reklamo a multiple murder, kidnapping with serious illegal detention ken dadduma pay.
Naamoan a ti met ummuna a panagdengeg ket intono September 16, aldaw ti Martes.
Ummuna metten a nangipila ni Ang ti reklamo kontra kenni Patidongan iti Mandaluyong City Prosecutor’s Office gapoiti conspiracy to commit attempted robbery with violence against or intimidation of persons, grave threats, grave coercion, slander, ken incriminating against innocent persons.
Inbatad ni Ang a pinangtaan isuna ni Patidongan nga iraman na iti panagpukaw dagiti mammallot no agkedked nga agbayad ti P300 million ken kasta met ti rakurak ni Barretto mainaig iti pangta.
Agpapan ita ket awan met pay ti komento ni Ang ken Barretto mainaig iti daytoy ngem ummunan a naglikudan da nga awan ti pakainaigan da iti daytoy.
