LAOAG CITY – Mamati ti constitutional law expert a ni Atty. Egon Cayosa a mabalinen a mapilaan ti agsusukot a kaso dagiti karaman kadagiti ghost projects iti laksid a saan pay a nalpas ti panagdengeg iti Kongreso.
Segun iti abogado, adon dagiti inadmitir dagiti sumagmamano nga opisyal iti serye ti panagdengeg ken mabalin nga usaren dagitoy kas ebidensiya iti korte.
Karaman kadagiti mabalin a mapilaan ti kaso ket dagiti project engineer ken dadduma pay a nagpirma iti proyekto ken dagiti contractor.
Kampante ti dati nga Integrated Bar of the Philippines president a makaanayen dagiti naukkon nga ebidensiya para iti pannakapila ti agsusukot a kaso uray agtultuloypay laeng ti panagdengeg iti Kongreso.
Inlawlawag na a saan a rumbeng a maulaw ti publiko kadagiti mapaspasamak iti Senado ken Kamara gapo ta dagitoy ket agpada nga ‘in aid of legislation’ laeng wenno mausar para iti panangbukel wenno panangaramid ti linteg.
Innayon na nga iti agdama ket nasken nga adda ti ipila a kaso ti Department of Justice kontra kadagiti amin a karaman iti daytoy.
